Dit is volbring

Wanneer ons die woord ‘skuldlas’, wat ’n selfstandige naamwoord is ontleed, vind ons dat dit op sy beurt weer saamgestel is uit twee selfstandige naamwoorde naamlik ‘skuld’ en ‘las’. Die woord ‘skuld’ kan ’n tweeledige betekenis hê naamlik:

1. ’n Materiële betekenis, soos om byvoorbeeld ’n geldelike verpligting teenoor iemand of instansie te hê, waar die geykte ‘ … of betaal is die wet van Transvaal’ [In ’n ligte luim my meer humoristies kontemporêre vertolking van laasgemelde geykte uitdrukking: ‘Die wet van Gauteng, is steel daai deng’.]  Bietjie van die punt af, maar ek konnie die versoeking weerstaan om eers hierdie stukkie humor te opper nie. Ek vertrou dat die leser dit ook sal geniet.]; en
2. tweedens het die woord ‘skuld’ ook ’n emosionele betekenis in die sin dat ’n mens homself  in ’n gemoedstoestand kan bevind waarin konflik ervaar word omdat hy iets gedoen of gesê het wat teenstrydig is met sy eie of universiële morele standaarde. In die emosionele sin van die woord kan ‘skuld’ dan gesien word as ’n verpligting wat ’n persoon teenoor ’n ander persoon het as gevolg van sy optrede voortspruitend uit die een of ander afkeuringswaardige gebeurtenis.

Wat die woord ‘las’ betref, het dit ook ’n tweeledige betekenis naamlik:

1. ’n Materiële betekenis, soos om byvoorbeeld twee goed aan mekaar te heg met iets soos gom of enige ander hegmiddel; en
2. ’n ‘Las’ in die figuurlike sin van die woord, soos : ‘ek dra ’n swaar las, of ek wil hierdie las van my rug afkry’, In hierdie verband lê die woord ‘las’ dan ook op die emosionele vlak van die mens. Ons vind dit in die Bybel in Gal. 6:2, ‘Dra mekaar se laste … ’

Kom ek trek nou vir die woord ‘skuldlas’, vanuit ’n geloofsperspektief, sy emosionele baadjie aan en ontleed die woorde van die profeet Jesaja, soos opgeteken in Jes. 53:4: ‘Nogtans het Hy ons krankhede op Hom geneem, en óns smarte – dié het Hy gedra…’

Die Hebreeuse woord wat Jesaja hier gebruik is die woord ‘nasa’, wat letterlik beteken: ‘om die skuldlas van iemand  anders op jouself te dra asof dit jou eie is.’ Dus moes Jesus, en het Hy ook, ons skuldlas van krankhede, hartseer, smarte, pyn, met ander woorde ons emosionele skuld, asook ons sondeskuld op Hom gedra asof dit Sy eie skuldlas is.

In die Nuwe Testament, Matt. 8 :17 lees ek “ … Hy het ons krankhede, (m.a.w. ons emosionele skuldlas), op Hom geneem … ‘. Die Griekse woord wat Mattheus hier gebruik is ‘lambano’,wat letterlik beteken ‘om iets weg te dra en permanent te verwyder’. Daardie ‘iets’ is ons emosionele- en sondeskuld.

Die skuldlas wat Hy namens ons aan die kruishout op Gólgota betaal het, kannie met materiële dinge vereffen word nie. Hy het my en jou, ja jy wat nou hier lees, se skuldlas met Sy kosbare bloed betaal.   ‘Tetelestai!’ – Jou skuldlas is ten volle betaal, het Hy aan die kruishout op Gólgota met ’n groot stem uitgeroep.

Dit is volbring.

——-ooo000ooo——-

(© Pieter Mostert) (Silwer)

BIBLIOGRAFIE

• Dake’s Anotated Reverance Bible Old and New Testament (1963) J. Dakes Dakes Bible Sales Inc. Lawrenceville, Georgia.
• Die Bybel 1953 & 1983 vertaling Bybelgenootskap van Suid- Afrika, Roggebaai, Kaapstad
• HAT (Verklarende Handwoordeboek van die Afrikaanse Taal), Tweede uitgawe, Tweede druk, 1981
• Jan van der Walt ed.al (2012) Interliniêre Bybel Grieks – Afrikaans Nuwe Testament Christelike Uitgewersmaatskappy, Vereeniging.
• Joubert, S. 2012 Ontsluit die Nuwe Testament: Omvattende Bybelse Reis vir ’n beter verstaan van die Skrif. Christelike Uitgewersmaatskappy, Vereeniging
• Odendaal, FF. (hoofred.) 2005. Vyfde uitgawe. Verklarende Handwoordeboek van die Afrikaanse Taa Johannesburg: Perskor.
• Vine’s Expository Dictionary of Old and New Testament Words (1971) F.F. Bruce. ed. Flemming H. Revelal Company, Old Tappan, New Jersey.

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag