Welkom, Besoeker
Welkom, Besoeker

Titel: Ek en die internet. (Brons)

Deur Taai
Datum gepubliseer: 15 Mei 2021 Aantal woorde: 355 888 Kere gelees 12

Woortelling: 350 woorde

“Oupa Gert! Johannes gaan staan groot-oog, uitasem binne die deuropening. “Wat was dit?”
Oupa plaas sy koppie hard langs die skootrekenaar neer en vryf vies die groter wordende nat koffiekol op sy hemp.
“Kom Oupa!”
“Ja, ja. Ek kom Johannes. My bene is nie meer so jonk nie.” Johannes staan nader, neem die uitgestrekte hand. Iewers verskeur ‘n hondekoor se getjankery die stilte. By die agterdeur begroet chaos hulle. Houtstukke, tuintoerusting, blompotskerwe en plante lê die wêreld vol besaai. “Wat de ongeluk?”
“Sjoe, Oupa! Dit lyk of hier ‘n bom ontplof het. Kyk… die tuinhuisie! Dis weg, daar’s nou ‘n groot gat in die grond.”
Woordeloos stap oupa in die rigting van die gat. Uit die hoek van sy oog gewaar hy ‘n beweging anderkant die gapende gat in die tuinmuur.
“Gert Koekemoer! Wat de joos het jy nou weer aangevang? Wag tot ek met jou vrou praat.”
“Ag ontspan Netta. Dis nie so erg nie.”
“Nie so erg nie. Kyk hoe lyk ons pragtige tuine en die muur… ‘n moerawiese gat is daarin geruk. Net verwoesting waar jy kyk.”
“Gmf… seker een of ander kwajong tiener. Gaan hou jou eerder besig met jou breiwerk as om kwaad te wil kom stook. Toe, toe Netta. Laat jy ‘n toon klap.” Al brommend keer sy terug na haar huis.
“Wat het Oupa gedoen? Vandat Oupa die internet laat installeer het… wel… Ouma Jackie sê Oupa vang deesdae snaakse goed aan.”
“Ek wou jou ouma verras met tuisgemaakte blomkunsmis. Sy wil die laaste ruk net organiese produkte in haar tuin gebruik.” Ingedagte krap hy sy kop. “Ek was so seker…” Sy hand gaan na sy broeksak en ‘n gekreukelde stuk wit papier kom te voorskyn.
Johannes tree nader. “Kan ek sien?”
Woordeloos oorhandig oupa Gert dit aan hom.
“Oupa … weet Oupa wat hierdie is?” Sonder om op ‘n antwoord te wag, gaan Johannes voort. “Dis ‘n resep vir ‘n kunsmisbom, nie ‘n blomkunsmis resep nie. Hierdie resep is om goed op te blaas.”
“Wat!? Nee!” Oupa gryp sy kop gepynigd vas. “My kierangkies gaan sweerlik braai vandag. Ek en die internet…”

© Taai Bonthuys




TEMAS
1 Kommentaar
  1. Anze

    15 Mei 2021

    Pragtig, baie dankie vir jou bydrae tot die Mei 2021 – OOP projek

Laat u kommentaar

GESKRYF DEUR

Jy moet ingeteken wees om boodskappe aan hierdie skrywer te kan stuur.

Publikasies: 50
Kommentaar telling: 6

Digter, Skrywer en professionele rekenmeester.

Horison Media

AfriForum – Trotse borg van INK dig/skryf kompetisie

FAK – Trotse borg van INK dig/skryf kompetisie

Die Afrikaanse Taalmuseum & -monument – Trotse borg van INK dig/skryf kompetisie

Gebruikers Aanlyn

0 Lid, 170 gaste aanlyn

Bydraes – Argief