gemoed van ‘n digter

 

 

hoeveel sin jy maak

van jou eie aardse bestaan

gekleur deur jou geestelike stemming

plaas jou binne bestek van gemoedsgesteldheid

of jy ateis, ekstensialis of christen-teoloog is

jou eie ervaring van angs, vrees en chaos

kan steeds lei na ‘n gemoedsontlading

 

ontlaai jy uitbundig

wanneer jy sportgebeure bywoon

tydens emosionele teologiese byeenkomste

is jy selfbejammerend tydens swak gesondheid

jy bly ‘n unieke wese, verantwoordelik

vir jou eie dade en jou eie lot

jou gevoel van relevansie

 

in hierdie filosofie van jou gees

lê jou vermoë om te ervaar en waar te neem

beide jou sensoriese en kognitiewe kommunikasie

bepaal jou persepsie, waaksaamheid en bewustheid

‘n onvermoë om te ontlaai kan jou beinvloed

dit raak jou gewete, geheue

en selfs kennis en begrip

 

juis tydens jou gemoedsontlading

leer mense jou ken vir wie jy werklik is

waar jy vandaan kom, wat jou dryf en raak

dit is ook waar dat die introvert moeilik ontlaai

terwyl die ekstrovert dit lukraak kan doen

hoe meer inhibisies jy ervaar

hoe minder sal jy ontlaai

 

hoe ervaar jy, individu ‘n gedig

lees jy die digter se ontlading daarin

kan jy digter se gemoed daaruit bepaal

of verbloem die filters van taal en etiek

digter se agtergrond en omgewing

in soveel lae van beskerming

dat hy slegs ‘n skim bly

 

Ó Tearlach.

Eksistensialisme beskou elke persoon as ‘n unieke wese, wat verantwoordelik is vir hul eie dade en hul eie lot.

Bewussyn is die vermoë om te ervaar of waar te neem

Ateīsme is ‘n filosofiese uitgangspunt dat daar geen god/gode anderkant die ervare werklikheid en geen geldige begirp van God bestaan nie.

Sensories – verwys na al die sintuie – voel, ruik, proe, hoor en sig, asook die balanssintuig.

Kognitief –  ‘n Term wat dui op aspekte en funksies wat verband het met die denke en idees