Jongste aktiwiteit:

Huweliksverraad (die grootste klugspel) 1499 Woorde

 

Amalia skud haar voorskoot uit. ‘n Dosyn mossies sak onder die perskeboom neer. Dit word ‘n gekwetter wat jy tot anderkant die varkhokke hoor. Die wind bring belofte van vroeë lentereën. Sy trek haar asem in. Miskien sal hierdie lente nuwe lewe vir Hartspoort bring.

Die bordjie hang windskeef aan die paal. Hartspoort. Liana blaas ‘n krul deur haar kersierooi lippe. Sy skiet die sigaret diep die veld in. Nou of nooit. Sy sal haar spykerhakkies vir eers moet wegpak. Sy druk ‘n Airwave in haar kies en vee die grimering van haar gesig. Haar hare bondel sy in ‘n poniestert bo-op haar kop. Dan betree sy die grondpad na haar toekoms.

Werfbrakkies kef om die hoek van die huis. Liana grinnik. Mens sou eerder ‘n boerboel of twee op ‘n plaas verwag het. Sy vries en trek die deur vining toe. ‘n Massiewe Pitbul kom om die hoek van die stoep aangewaggel. Sy tande ontbloot in ‘n vriendelike groet. Op sy hakke ‘n ewe groot Amasone met ‘n dubbelloop haelgeweer.

“Is ek veronderstel om jou te ken?”

Liana wys na die pitboel.

“Is dit veilig om uit te klim?”

“Nee, sit jy maar net doodstil totdat ek weet wie jy is en wat jy soek!”

Amalia lig die loop ‘n aks hoër.

“Gerhardus het my genooi. Ek is Liana. Liana Breda. U moet Amalia wees. Is Gerhardus hier?”

“Perskebloeisel! Moeder dis Liana waarvan ek jou vertel het. Kom hier my blom. Skoert Brutus.”

Gerhardus skop in die rigting van die honde. Nat merkies lê teen die motorwiele. Liana spring oor ‘n kol en sien uit die hoek van haar oog hoe Amalia die pitboel prys. Sy gaan haar oë moet oophou.

Liana vou haar klere in hopies op die bed. Sy trek aan die vals bodem van die tas. Alles is nog in plek. Gelukkig is daar selfoon opvangs.  Sy kan haar boodskappe uitkry en vinnig weer verwyder. Sy wip toe Gerhardus agter haar praat.

“Kom perskeblom, ek wil jou die plaas gaan wys. Jy gaan binnekort die vrou van die huis wees. Jy moet weet hoe alles werk. Trek jou waterstewels aan. Dit sal help teen die bosluisies wat volop in die veld is.”

Amalia lig die gordyn. Sy wag totdat Gerhardus en Liana deur die heining klouter. Dan vleg haar vingers oor die skerm van haar loopfoon.

“Sy’s hier. Ek hou jou op hoogte. Gerhardus het hoek en sinker gesluk aan die een.”

Liana voel hoe die druppeltjies teen haar rug afkruip. Dit gaan ‘n stywe twee maande wees. Sy rol haar moue op en plaas die eiers in die mandjie. Die plaaswerk doen haar goed. Net een problem. Gerhardus kruip onder haar vel in. Sy skouers blink in die oggendson. Hy het van sy hemp ontslae geraak. Duisende vlinders tol in haar maag. Sy sal haarself moet regruk. Sy is hier om ‘n taak te voltooi. Nie om verlief te raak nie. Die troue kruip vinnig nader en sy kon nog geen bewyse opspoor nie. Gerhardus is so skoon soos ‘n koekie Sunlight na ‘n bondel plaaswasgoed. Miskien moet sy in Amalia se boekies begin rondkrap. Wie weet wat die skoonmoeder dalk geheim hou.

Die rooi kolletjie verklap die donker figuur se skuilplek tussen die bome. Liana strek haar uit en maak of sy dit nie opgemerk het nie. Sy wag ‘n paar minute voor sy gangaf sluip. Almal het al gaan slaap. Sy sool vinnig na die hoek van die huis. Die kooltjie brand helder en verdof dan weer. Liana hurk en rig die klein nagverkyker op die figuur. Amalia! Dan verstyf sy. Daniël! Dit kan nie wees nie. Daniël was die een wat haar gehuur het om Gerhardus te illumineer. Sy lig die verkyker. Amalia en Daniël is vasgevang in ‘n stoeisessie wat Hulk en Big Show soos kinders laat lyk. Sy sal genoeg tyd hê om te krap.

Amalia was nie juis versigtig met haar inligting nie. Liana se oë rek. Sy was net ‘n doel tot Amalia en Daniël se geldgierigheid. Sy lees die boodskap weer, dan plaas sy alles terug in die laaikassie.

‘n Klipdassie loer nuuskierig oor die rots. Liana se gedagtes dwaal. Sy het in die verlede takies vir Daniël verrig maar hierdie was buite haar veld. Haar werk by die speurafdeling noodsaak haar om soms ondergrond te gaan. Daniël het haar verseker Gerhardus is deel van ‘n groep dwelmsmokkelaars wat jong mense se lewens verwoes. Foto’s, briewe, alles. Opgetower deur hom en Amalia. Geen wonder sy kon geen bewyse vind nie. Dat Daniël haar na al die jare so kon mislei. Dit sou lyk na ‘n “wedding gone wrong”. ‘n Wilde skietery en ‘n dwaalkoeël. Daniël weet sy haat dwelmgespuis. Dit was waarom sy ingestem het om as bruid Hartspoort toe te kom.

“En nou. As jy hier in die son sit en bak?”

Gerhardus sak langs haar neer. Die koppie kyk uit oor Hartspoort. Amalia lyk soos ‘n dwergie waar sy langs die varkhokke staan.

“Jy weet sy is nie my ma nie? Sy het lewensreg op die plaas na my pa se dood. Die plaas is aan my bemaak. Hy was alleen by die huis toe die ongeluk plaasgevind het. Hy was besig om die dak reg te maak. Sy voete het gegly en hy het kop eerste op die sementblad beland. Amalia het nie juis ooghare vir my nie.” Liana plaas haar hand oor Gerhardus sin. Hy het so diep in haar hart gekruip. Hierdie maand en ‘n half het sy die regte Gerhardus ontmoet. ‘n Jaar gelede het hulle (gerëel deur Daniël) by die sokkiejol van die seunskool ontmoet. Sy moes haar kaarte mooi speel. Gerhardus het daarvoor geval. Nou is sy die een wat val. Hard en behoorlik.

Vroegoggend word daar gewerfskaf. Die tuin moet skoon. Amalia blaf bevele uit. Tafels word aangedra en tafeldoeke uitgeskud. Liana dring daarop aan om met die tafel versiering te help. Die stoele word met tafsy en strikke oorgetrek. Liana versteek die baretta onder haar stoel. Die knaldemper stewig aan die snoet vasgeskroef.

Die satyn vloei deur Liana se vingers. ‘n Rilling rol langs haar ruggraat af. Die rok pas soos ‘n handskoen. Daniël het besluit hy sal pa speel. Liana is ‘n weeskind. Sy kon nie juis weier nie. Sy wonder net waarom hy nou skielik betrokke wil raak. Hy het homself as haar oom kom voorstel, haar enigste familielid wat teenwoordig sal wees. Verder is dit net plaasmense en boere van die naby gelëe plase. Sy het haar planne mooi agtermekaar. Daniël is nou ‘n vlieg in die salf maar miskien is dit beter so. Sy sal nou twee koeëls mors in plaas van een. Amalia en Daniël sal vandag die plaas in ‘n lykswa verlaat. Die kamtige aanvallers sal ‘n paar van die gaste wond en dan die hasepad kies voor die polisie opdaag. Liana dink aan die nota in Amalia se laai. Hulle sou sorg dat daar bewysstukke teen haar is. Skermskote waar sy Gerhardus koelbloedig doodskiet. Amalia sou volle erfgename van Hartspoort word.  Sy wat Liana is… wel Daniël het sy kaarte mooi gespeel, sy sou lewenslank sit!

Daniël vou sy hand om Liana s’n. Hy lei haar paadjielangs. Gerhardus lig haar sluier. Hy groet Daniël met ‘n handdruk. Dan draai die bruidspaar na die Pastoor wat met ‘n glimlag die seremonie afhandel.

“Jy mag die bruid soen.”

Gerhardus en Liana neem hulle plekke aan die hooftafel. Liana voel na die baretta onder haar stoel. Sy sug toe sy die staal teen haar vingers voel. Dan gewaar sy die minibus wat met die grondpad afkruip. Haar vingers sluit om die pistool. Pandimonium bars los. Liana sien hoe haar koeël sekuur tussen Amalia se oë beland. Terselfdertyd voel sy haar arm verlam. Daniël grynslag toe sy hand in sy baadjie verdwyn. Daar is ‘n warm gloed op haar bors. Haar rok vlek bloedrooi. Sy sak grond toe terwyl voete om haar maal en kolk. Stofwolke skiet op toe die taxi vining weer verdwyn. Iewers kraai ‘n haan.

“Sit mnr Koen”

Dis ‘n maand na Liana en Amalia se dood. Die prokureer kug en gaan voort.

“U vader se testament was pertinent. U sou Hartspoort slegs erf indien U in die huwelik sou tree. U vader was van mening dat U… wel dat U nie juis in vroue belang stel nie. U het hom verkeerd bewys. Aangesien beide U stiefma en eggenote tragies van U weggeneem is laat dit ons met geen ander keuse as om sy laaste wense te eerbiedig nie. U is dus die wettige eienaar van Hartspoort en U vader se besigheid. Ons beste wense vergesel U.”

Gerhardus glimlag toe hy die voordeur oopsluit.

“Ons het dit gedoen! Maar sê my hoe het jy geweet Liana sou val vir die simpel nota in Amalia se bedkassie?”

Daniël druk Gerhardus teen hom vas.

“Want my liefste, Liana het gedink sy is baasspeurder maar sy het vergeet wie haar opgelei het. Kom hier my perskebloeisel, kom ons gaan vier ons nuwe rykdom!”

 

Amanda




1 Kommentaar

Maak 'n opvolg-bydrae

Up
Top Ranked Users

[joinup_core_top_members columns=”1″ space=”no” max_members=”3″ behavior=”columns” columns_responsive=”predefined”]

Activity Feed