kyk noord

 

hou jou kop in die sand

dan waai die wind nie teen jou wang

 

gaan maar net aan

jy kan tog niks daaraan doen nie

 

kyk noord

en voeter voort

 

sê maar liewer niks nie

terwyl wit kruise om jou groei

.

my hande is afgekap

ek leef in ‘n ontkennende wêreld

 

skuil om die hoek

solank jy tog net geen opinie hoef te verklaar

 

leef vir hierdie oomblik

môre is in elk geval nie in ons hand

 

beskawings kom en gaan

dit is maar die verloop van die wêreld

 

reageer op min

want jou vel is lankal nie meer dun

 

keiser, jou stad is aan die brand

wat kan ek tog doen – my lankal daarmee versoen

 

weergalose aardverwarring verys

binne drome van aardverwarming

 

dermatologiese uitstel van die lot

van elke sondaarsvolk wat steeds vreet aan die vet

 

gaan tog net voort – die aarde is rond

o, ..of is dit dalk nog plat – soos die gode se lat

 

bitter, bekker, lekker

suig die ketter aan sy rekker

 

Ó Tearlach.