LIEFDESVERHAAL

LIEFDESVERHAAL

was jy nie hier by my gewees nie
sou ek nogsteeds na liefde soek
my storie sou nie dieselfde lees nie
was jy dalk in ‘n ander een se boek

alleen sou ek deur my dae swerf
soekend na jou lag se sprankel
wie sou my met liefde bederf
wie sou kon keer as my lewe wankel

maar Hy’t geweet ons pas inmekaar
gesien jou lig sou deur my oë kon skyn
jou stem sou storms in my laat bedaar
jou glimlag sou my skadu’s laat verdwyn

en deur die jare is ons boek se blaaie
in detail soos deur Hom bepaal
gevul met stories van ons draaie
verewig ver-ink ons liefdesverhaal

© – Barbara Smit 16/12/2017