Welkom, Besoeker
Welkom, Besoeker

Titel: Met die hand in die pampoen gevang.

Deur Taai
Datum gepubliseer: 12 Desember 2020 Aantal woorde: 353 899 Kere gelees 28

Woordtelling: 349 woorde

“Wat nou? Wat het jy aangevang?”
“Wie sê ek het iets aangevang, Gert? Mmmm?” Otto neem plaas agter sy lessenaar, vou die dossier voor hom oop en laat sy oë vlugtig oor die inhoud gly.
“Man, dit staan duidelik oor jou bakkies geskrywe, in groot hoofletters! So jy kan netsowel daarmee uitkom. Iets het jy beslis aangevang, ek ken jou ook nie van gister af nie. Jy is net te vrolik, en ek bedoel té.”
Otto se oë bly vasgenael op die dossier voor hom. ‘n Lang stilte skop viervoet vas tussen die twee mans.
Gert gee ‘n lang, harde sug. Hy trommel ongeduldig met sy vingers. “Toe nou, Otto. Ek wag…”
Met ‘n skalkse glimlag kyk Otto verby Gert se kop na die kantien se deur. “My maat. Al wat ek vir jou vandag gaan sê is … na vandag gaan my probleem iets van die verlede wees!So, hou maar jou oë en ore oop. Die waarheid seëvier altyd. Dis al wat ek vir jou gaan sê en niks meer nie.”

* * *

Dis net na een. ‘n Aardskuddende gil tref die stilte. Gert spring verskrik op en nael na die kantien. By die deur draai hy verbaas om en sien Otto doodluiters besig om te skryf. “Jý die oorsaak?” beduie hy vaagweg in die rigting van die gil. Otto se glimlag is al antwoord.
By die kantien loop hy hom trompop in ‘n siedende Willie vas. “En nou, Willie?” Gert gewaar die kosblik en ‘n gehapte toebroodjie op die vloer. Hy skrik toe ‘n bekende stem skielik agter hom opklink.
“Daar’s hy! Hét jou! Sooo lank wonder ek al wát van my kos word! Hoe het hy vandag geproe?”
Willie skuur brommend verby Otto en klap ‘n vinnige toon na sy kantoor. Gert stap die kantien binne en begin die stukke van die toebroodjie versigtig optel. Verstom swaai hy om, ‘n stert netjies tussen twee van sy vingers. “En waar, as ek mag vra, het jy die arme gediertetjie gevind … En brrr, ek wil nie weet hoe klink tande wat inslaan op sagte muisribbetjies nie..!”

© Taai Bonthuys




TEMAS
1 Kommentaar
  1. Anze

    12 Desember 2020

    Pragtig, baie dankie vir jou bydrae tot die Desember 2020 – OOP-projek

Laat u kommentaar

GESKRYF DEUR

Jy moet ingeteken wees om boodskappe aan hierdie skrywer te kan stuur.

Publikasies: 50
Kommentaar telling: 6

Digter, Skrywer en professionele rekenmeester.

Horison Media

AfriForum – Trotse borg van INK dig/skryf kompetisie

FAK – Trotse borg van INK dig/skryf kompetisie

Die Afrikaanse Taalmuseum & -monument – Trotse borg van INK dig/skryf kompetisie

Gebruikers Aanlyn

2 Lede, 659 gaste aanlyn

Bydraes – Argief