Ou plaashuis

Ou plaashuis

ek verlang na die ou plaashuis
op ‘n vlakte wyd en oop
met ‘n klipkoppie daar naby
waar die dassies vry kan loop

‘n windpomp wat al sugtend
water in die sinkdam stort
en ‘n reusegroot ou bloekomboom
waar uile in kan droom

‘n huis met ‘n wye stoep
waar smorens vroeg die rooidag roep
waar ek met koffie in die hand
kan uitkyk oor my hinterland

‘n voorhekkie wat knarsend
jou tuiskoms uitbasuin
met ‘n hond wat al die heeldag
geduldig vir jou wag

‘n houtdeur, skerm teen die wind
as reendruppels kletter op die sink
in die koolstoof brand kameeldoringhout
en my liefde gloei soos suiwer goud

Estelle Rubow
25/02/2017