PSALMUS MEUS LUCIS

ʼn psalm van oorgang
gespeel op die snare
van frekwensies van lig …

die lewe is ʼn konstante reperterende lied
van lewe se vreugde én lewensverdriet

psalmverse wat eggo teen grotgrens se wand
binne menslike perke van vlees en verstand

koorsang en solo genoot in liriek
andante, fortissimo, semper-musiek

soos suising in ore waar hartklop tromslag
sal liglinte venster met die aankoms van dag

ʼn tonnel supernova in sterstof se gas
hipnotiese roepstem van verligting van las

ʼn lokkende sielsprong oor die ligbrug se blink
na die strome wat waters van vrede sal skink

sal die tolhek se meester my vlerk-was laat smelt
of my deurlaat in euforie sonder aanbod van geld?

as die ringkring vernou en die poorthek weer sluit
sal die tromslag van tyd nie oor dood kan besluit

maar die visie geëts op die retina se doek
sal getuig van die lewe waarna my siel honger soek

Etna Wepener ©️

Voetnota:

PSALM – lied
PSALMUS MEUS LUCIS – My psalm van lig
ANDANTE – stadig maar seker, stadig, ingedagte
FORTISSIMO – baie hard, donderend
SEMPER – al die tyd, het nie verander nie

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag