Tamarisk, my krismisboom

as soggens vroeg die oggenddou
die toiingrige tamarisk omvou
silwer pêrels aan sy takke hang,
fraiingtakke in ‘n wolkiedroom
omtower tot ‘n krismisboom
– skitterblink in die son –

spring daar in my ‘n vreugde op
oor die eenvoud en die skoonheid
van hierdie dowwe, dor woestyn
wat in klein-klein maat
maar tóg, so grootliks deel
van sy vreugde en sy pyn

Estelle Rubow
27/10/2016