wintersprokie – ‘n proloog (Goud)
warmgeslaapte nagasem tref en versplinter
die vroegoggend winterlug
hang vir ‘n wyle damperig rond
tot dit koulik wegdryf
ryptapyte bevestig:
die herfs het gewyk
sê met hul diamantglinster
dat die winter ‘n sprokie is
en die Skrywer daarvan
ook die kreatiewe Skepper van
stil en ysig-statiese aande
en alleswinter tussen-in
selfs die doodsheid van
die bibberseisoen
wat die weelderige herfskleure
met ysige vingers kom uitvee
dien ‘n uitgemete doel
in die sprokieseinde
vou die melancholikus
sy trooskomberse
stywer om sy lyf
en die bemindes se liefdesasem
maak druppelspoortjies
teen yskoue ruite
1 Kommentaar
Maak 'n opvolg-bydrae
Jy moet aangemeld wees om 'n kommentaar te plaas.
Anze
Pragtig, dankie vir jou bydrae vir Mei 2024 - OOP projek