
. . . as jy kon sing
Jy – wat my liefhet –
weet waar om die sterre te vind
tussen rotse op die strand.
Pasgebore geitjies
en die kuiken van ‘n kolgans
voel veilig in die palms van jou hande.
As ek jou vra oor die voëls van die hemel
en die aarde en die water
– dan ken jy elkeen by die naam.
Alles wat gebreek is, maak jy heel.
Jy help my dra aan elke las
– ek rank my aan jou heelal vas.
Daar is blydskap in jou oë as jy my sien
en na soveel somers
lees ek nog verwondering
in die bloutes van jou kyk,
in jou glimlag
wat nooit wyk nie.
Jy soen my teen my voorkop as ek slaap.
En liefde bely
in die mooiste neurie-klank
sou jy na my hartsoor bring
. . . as jy kon sing.
© Carma Shaw
13 Februarie 2017
3 Kommentare
-
Barbara
Ag dis so pragtig!!!
Maak 'n opvolg-bydrae
Jy moet aangemeld wees om 'n kommentaar te plaas.
Anze
Pragtig, baie dankie vir jou bydrae tot die Liefde projek