Demensie
My ma sê sy kan nie uit die huis kom nie
want dit vervul jou met angs, en sy vrees
dat – indien sy nie vinnig weer tuis kom nie –
daar woede en vrae in jou stemtoon sal wees.
Sy sê jy het weer in die nag op gestaan –
slaaploos, verward en vir die donkerte bang
en sover as jy loop, sit jy ligte aan
tussen jou kamer en die punt van die gang.
Jou vingers – wat eens flink was – het dom geraak.
Dis vreemde hande wat jou aantrek en was.
Die krag in jou bene – dié het jou versaak.
My ma hou jou beker en vurk vir jou vas.
Kort na dagbreek – in ‘n skemer hospitaal –
het dood toe die lig uit jou blink oë kom haal.
© C. Shaw
24 November 2016
Viooltjie
Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat te sê het, en dat julle lekker saam sal lees :-)
7 Kommentare
-
-
Viooltjie
Baie dankie vir die inloer en kommentaar, Inkmoderator. Ek waardeer dit. Ek maak die fout reg. :-)
-
-
Anze
Pragtig, baie dankie vir jou bydrae tot die ‘n Stem vir Gesondheid projek
-
Palet
Hartseer.. wanneer die donker jou kom haal
-
neels
Goeie bydrae veral as mens in ag neem dit is nie jou gewone lyn nie
-
Koekekranka
Vir my is hierdie werklik slim en sinvol. Welgedaan!
-
Viooltjie
Baie dankie, Palet, Neels en Koekekranka. Ek waardeer die saamlees en die kommentare regtig baie :-)
Maak 'n opvolg-bydrae
Jy moet aangemeld wees om 'n kommentaar te plaas.
Inkmoderator
Viooltjie, wat 'n moeilike onderwerp om sinvol te onderneem sonder om die inhoud té emosioneel te maak. Net so toevallig: die siektetoestand word 'demensie' genoem en moet nie met 'dimensie' verwar word nie. Ek neem aan dit is net 'n vingerfout. Ek was aan die begin effe verward met die drie stemme (skrywer, karakter ma, karakter pasiënt) maar dit word gou genoeg duidelik en daarom pla dit nie veel nie. Ek dink jy het 'n groot onderwerp aangepak en het dit skaflik en keurig weergegee. Mooi. Groetnis IM