Welkom, Besoeker
Welkom, Besoeker

Titel: Hierdie vrou van Afrika

Deur Viooltjie
Datum gepubliseer: 30 Maart 2018 Aantal woorde: 332 637 Kere gelees 7

Waar was ek
toe die wêreld nog stikdonker was,
lank voor die eerste lig verskyning;
toe U twee klippe kap tot vonk –
waar was die kruitvat,
waar die lont?
Hoe vurig die geboorte van die son.

Was ek daar
toe U die sterre deur die heelal string
en die maan poleer tot edeltin,
toe U haar lyf vol kraters kerf,
haar loslaat
om (tot in alle ewigheid)
deur die hemelruim te swerf?

Het ek aanskou
hoe U die droë grond
van die waters skei;
hoe het U dit reggekry
om die grense vas te stel
waar branders in die sand wegsink
en met watter beker
het U die mere vol geskink?

Waar was ek
toe U die berge en die dale
met U hande vorm;
toe die eerste waters oor die Drakensberg
se kranse val 
en aan die groot rivier geboorte gee;
toe U haar laat kronkel
oor die dorre aarde
en haar laat uitmond in die see?

Was ek neffens U
toe U die eerste blom laat bloei,
die eerste Kremetart laat groei
en die vrugte aan haar takke hang;
toe U die biesies langs die stroompie plant,
was ek daar –
aan U linker- of U regterkant?

Waar was ek
toe die eerste arend na benede daal
en ‘n geelvis uit die water haal;
toe ‘n springbok vir die eerste keer
so witgat-kromrug pronk;
was dit oor Karoo se bos
of oor Kgalagadi roesrooi grond?

En toe U na die werke van U hande kyk;
gesê het “dit is goed”
was ek aanwesig, Here –
dalk net die weet van U gemoed?

Het U oor die Vrystaatvlak gestaar;
was ek al dáár
toe die naguiltjie se weëmoedslied refrein;
was ek die groot gedagte,
het U aan my gedink,
was ek in die sagte lig
wat in U skeppersoë
reeds blink?

*

Waar was ek
wyl U vir Adam in die wieg neerlê;
het U lippe
(in ‘n preweling)
toe ook hiérdie vrou van Afrika
se naam gesê?

© Carma Shaw




TEMAS
1 Kommentaar
  1. Anze

    31 Maart 2018

    Pragtig, baie dankie vir jou bydrae tot die Maart 2018 – Digkuns projek

Laat u kommentaar

GESKRYF DEUR

Jy moet ingeteken wees om boodskappe aan hierdie skrywer te kan stuur.

Publikasies: 382
Kommentaar telling: 935

Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat ek te sê het, en dat julle lekker saam sal lees :-)

Horison Media

AfriForum – Trotse borg van INK dig/skryf kompetisie

FAK – Trotse borg van INK dig/skryf kompetisie

Die Afrikaanse Taalmuseum & -monument – Trotse borg van INK dig/skryf kompetisie

Gebruikers Aanlyn

0 Lid, 100 gaste aanlyn

Bydraes – Argief