Jongste aktiwiteit:

Kersnag in die Karoo

Heel die hemel kyk neer
oor vaal bossies en klip
na ‘n stal en ‘n windpomp
naas ‘n kraal en ‘n krip.

Al die melkweg se sterre
skitter helder daarbo –
oor ‘n stofpad wat kronkel
deur die dorre Karoo.

En elke naguiltjie roep
sodra die son ophou skyn
en laat gesange vol hoop
deur die droë land refrein.

Daar waar nagte nog stil raak
– asof oor heilige grond –
leef elke mens en elk dier
met die Heer in verbond

en word vrede op aarde
net ‘n werf met ‘n dam
en ‘n volmaan wat blink
bo ‘n ooi – langs haar lam.

©Carma Shaw
11 Desember 2017




Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat te sê het, en dat julle lekker saam sal lees :-)

3 Kommentare

Maak 'n opvolg-bydrae

Up
Top Ranked Users

[joinup_core_top_members columns=”1″ space=”no” max_members=”3″ behavior=”columns” columns_responsive=”predefined”]

Activity Feed