Sag soen die Nylstroomson
my hart lê vasgevang
in Nylstroom se natuur
waar in die gloed van
‘n laataand vuur onder
die hemelkom hang
is die groot genade (asof
sonder swaartekrag)
gevul met Vryheid van Bo
die mooiste van mooi
is die sonsopkoms
oor die Springbokvlakte;
dis daar waar die son
haar roete na opkoms verpas
en ‘n wyle sprakeloos vertoef
om die reinheid in te adem
van die breekmooi natuur
dis hier waar die bosduiwe in vryvlug
oor doringbome en wit karee vlieg
deur die onmeetlike ruimte
gevul met bosveld geure
en onder insek getjir
nooit stil word nie
die landskap se unieke bekoring
wat my wange saggies soen
betower opnuut my hart
onder die strale
van die bosveldson
© Anzé Bezuidenhout
Anze
Woorde is my asem en skryf my passie!!! Ek waardeer elke stukkie kritiek, verkieslik positief, maar kan die negatiewe ook hanteer. Dankie dat jy die tyd neem om na my werke te kyk en dit te beoordeel. Ek is n Boeremeisie in murg en been... mal oor die wye natuur van plaaslewe wat my omring Ek is getroud met die wonderlikste man (Willie). Ons is geseend met 3 pragtige dogters en 'n kleinseun en 3 kleindogters. My verhouding tot my Skepper loop baie diep en ek dank Hom elke dag vir al die voorregte en genade gawes wat ek so onverdiend ontvang... Loutering is deel van my lewe en ook daarvoor dank ek Hom daagliks want dit maak dat daar altyd groei in my lewe is...
3 Kommentare
-
-
Anze
Dankie liewe Suzette!
-
-
Charleine
Pragtig, Anzé. Dit voel sommer soos 'n aand by die Wildtuin!
Maak 'n opvolg-bydrae
Jy moet aangemeld wees om 'n kommentaar te plaas.
Palet
Pragtig!