Sing vir oulaas weer Elvis
gee my jou hande
vir die heel laaste keer
kyk, ons albei het letsels
ons albei het seer
wys vir oulaas jou wonde
en ek wys jou myn’
beide geskonde
gevlek en onrein
die lig in jou oë
dit bly my ontwyk
eens was daar sterre
en lag in jou kyk
hoe sag kon jou blik wees
hoe kil is dit nou
gister se warm
tot yskoud verflou
*
en onthou jy September
die son deur my ruit
die kwikstert en mossies
wat fladder en fluit
*
bly net ‘n oomblik
vertoef net ‘n uur
rus in my stilte
voel weer die vuur
eens tog genote
dit was ek en jy
kom môre, my liefling
is dit vir altyd verby
laat die klank van jou stem
my weer streel soos musiek
en die sang oor jou lippe
weer die liefde liriek
en sing net vir oulaas
weer ‘n Elvis verdriet
(are you lonesome tonight)
dis die heel seerste lied
*
maar onthou jy September
en my blomparadys
die duif en die muisvoëls
in die boom langs my huis
*
en netnou, ja netnou
is ons vir altyd verby
so, vertoef net ‘n oomblik
vir oulaas by my
‘k wil sê dat ek liefhet
dis swaar om te praat
soveel nooit gesê nie
en nou’s dit te laat
maar net voor jy omdraai
net voordat jy gaan
hou my net vas, lief
en sê jy verstaan
gee vir oulaas jou hand
en ek gee jou myn’
kyk, ons beide het letsels
geskond’ . . . en onrein
C. Shaw
30 Augustus 2015
Viooltjie
Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat te sê het, en dat julle lekker saam sal lees :-)
6 Kommentare
-
Niel Cloete
Ek lees dit oor en oor. Dis sooo mooi!
-
Anze
Briljant!!! Ek hou van die herhaling dit werk!
-
Janetta-Helena Boonzaaier
Al die mooi en belangrike dinge wat nooit in 'n verhouding gesê word nie soos die versekering dat jy liefhet, dat jy omgee, totdat dit té laat is en dit ''moeilik is om te praat'' 'n Mooi uiteenseting van 'n mislukte verhouding.
-
neels
Dit is n pragtige ode carma
-
Evelyn van der Merwe
Uitstaande gepen. Volpunte vir die ene.
Maak 'n opvolg-bydrae
Jy moet aangemeld wees om 'n kommentaar te plaas.
Amaspoke
Uitstekende werk! Dit verpersoonlik hoe ek voel.