afskakel

saans as dit donker word
verdwyn seegeluide soms
afhangende van heersende
wind wat geluide aanbring

later verander temperatuur
en bring dit warmer winde
van duine-kant wat verhit
verander vog gehalte ook

elke wending van die maan
het invloed op mens en dier
spring getye kom en verwoes
laag getye vreet sandbanke

op my duin voel ek dit ook
lewe – soos jy ouer word
wil stadiger metaboliseer
diep binne skakel iets af

in jou stap en trappe klim
met effense waggelende
beweging wat lyk soos draf
in jou hart weet jy daarvan

tog is elke wending ‘n seën
elke asemteug ook net genade
elke nuwe dag ‘n self-prestasie
alles maak jou net meer nederig

soos seisoene kom en gaan
verander jeudelike brawade
na weldeurdagte gedagtes
verander mense-gees en siel

©Teárlach