Dorre krake
huilend loei die westewind
deur hulp’lose vee
se karkasbene;
waar hul oë smagtend
(na genadewater )
verward na bowe vlug
hang dit daar soos verlepte sonne
in droog-oog traan
oor ‘n stof-rooi horison
prewel-bede
stort hakkelend
sodat hemele saam sal huil
dat daar steeds iewers
‘n vuis-wolk sal skuil
sodat lewe weer
oor verdorde damwal
oop sal skeur
hartbrekend skreeu die gebulk van vee
mag die Vader spoedig reën laat val
met Sy vinger oor dorre aarde vee
sodat krummels van verdorde plaasdam
(waar afgebidde reëndruppels
juigend na benede kan plons )
om die droogte krake
met genade te oorspoel
© Anzé Bezuidenhout
Anze
Woorde is my asem en skryf my passie!!! Ek waardeer elke stukkie kritiek, verkieslik positief, maar kan die negatiewe ook hanteer. Dankie dat jy die tyd neem om na my werke te kyk en dit te beoordeel. Ek is n Boeremeisie in murg en been... mal oor die wye natuur van plaaslewe wat my omring Ek is getroud met die wonderlikste man (Willie). Ons is geseend met 3 pragtige dogters en 'n kleinseun en 3 kleindogters. My verhouding tot my Skepper loop baie diep en ek dank Hom elke dag vir al die voorregte en genade gawes wat ek so onverdiend ontvang... Loutering is deel van my lewe en ook daarvoor dank ek Hom daagliks want dit maak dat daar altyd groei in my lewe is...
4 Kommentare
-
Evelyn van der Merwe
Ken ons nie ieder en elk hierdie hartseer blik as ons staar oor 'n lappie grond wat smag na Sy genadedruppels. Pragtig beskrywend gepen.
-
Anze
Baie dankie Evelyn en Neels ek waardeer julle goue woorde!
-
Annamarie du Toit
Baie mooi beskrywend.
Maak 'n opvolg-bydrae
Jy moet aangemeld wees om 'n kommentaar te plaas.
neels claasen
so n passende werk vir n bitter droë Vrystaat