Kelkiewyn*
Hoe wit is die wit sneeu
en hoe swart jou swart jas.
Jy glimlag soos gister
toe jy nog hier was.
Onthou . . .
bottergeel vlinders
vlinder immer verby
die lillablou blomme
wat elke somer gedy.
Hier wag skilferbasbome
– wat wyd alom kroon –
waarin houtkappers, duiwe
en meelogies woon.
Na elke lang droogte
word ons altyd geseën –
teen skemer lê ons damme
vol van silwerblink reën.
Kelkiewyn in die stof –
sterre tuimel daar bó
oor ‘n grondpad wat kronkel
deur die Tankwa Karoo
en elf pelikane
koers oor Melkbos se strand
daar waar jy eens geloop het –
koue water, warm sand.
*
So, as jy ooit verlang
na amber klippe en son
as jy voel jy’t verdwaal
as jy huis toe wil kom –
volg net maar die roete
(dis tog oral te vind)
oor die blou van die see,
in die vlug . . .
van die wind.
© Carma Shaw
2 Januarie 2017
*Kelkiewyn – Die Kelkiewyn (Pterocles namaqua) is ‘n voël(patrys) wat in die weste en sentrale gedeelte van Suider-Afrika – in halfwoestyn en grasveld – leef.
Viooltjie
Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat te sê het, en dat julle lekker saam sal lees :-)
6 Kommentare
-
-
Viooltjie
Baie dankie, Neels. Ek waardeer jou lees en kommentaar :-)
-
-
Palet
Baie mooi
-
Viooltjie
Ek waardeer, Palet. Baie dankie :-)
-
-
Kiekies
Luide aanhoudende applous!! Ek het nog nooit-ooit een van jou gedigte gelees wat nie pragtig en veelseggend was nie.
-
Viooltjie
Ai, Kiekies, jy is dierbaar. Baie dankie vir jou altyd entoesiastiese kommentaar :-)
-
Maak 'n opvolg-bydrae
Jy moet aangemeld wees om 'n kommentaar te plaas.
neels
Soos gewoonlik oortref Carma haarself. Jy verbeter ook net met elke werk