My belangrikste samesyn.

My belangrikste samesyn.

Deur die Woord sal jy sien dat Jesus mense kos gegee het en saam geëet het. Van die bekendste was die ete wat Jesus en sy dissipels gehad het kort voor Hy aan die kruis sou sterf. Volgens die Skrif het Jesus uitgesien na die samesyn van ʼn maaltyd met sy geliefde mense.

As klein dogtertjie het ons ook aan tafel gesit en eet, hierdie is vir my kosbare herinneringe. Dit was dan ook hier waar ons gelag en gesels het, maar soms ook koppe gestamp het. Hier het ons as gesin oor die dag besin en gedroom oor die toekoms.

Ek kan byvoorbeeld een maaltyd presies onthou toe my oupagrootjie, oupa Koos vir ons kom kuier het. Hy het oudergewoonte na ete vir ons huisgodsdiens gehou en het sy Nederlandse Bybel nadergetrek. Ons as klein kindertjies het doodstil, groot-oog na hom geluister alhoewel ons maar baie min van die Hollandse woorde kon verstaan. Ons sou dit egter nie waag om te lag nie. Oupa Koos het met sy gebruiklik sagte “amen” afgesluit. Ons kon hom beswaarlik hoor so sag het hy geprewel aan die einde van sy gebed. Ons moes amper so met een oog loer om seker te maak hy is klaar.

Deesdae is die tye meer gejaagd, maar ons maak nou nog ʼn punt daarvan om middag-ete saam om die swart houttafel te vergader.

Die kosbaarste samesyn wat ek egter nou ervaar is as ek soggens douvoordag by die einste houttafel plaasneem met my beker koffie en my Bybel. Hier is waar ek my Heer ontmoet. Hier is waar ek my krag vandaan kry. Hier beleef ek volkome vreugde van aanbidding. Ek dink aan hoe die psalmdigter moes gevoel het toe hy na ʼn plek van aanbidding wou gaan.

“Ek WAS BLY toe hulle vir my gesê het: Laat ons na die huis van die Here gaan!” – Psalm 122:1

Om tyd in die Woord te spandeer is vir my sinoniem met samesyn. Nêrens voel ek so geliefd.

©Marlene Erasmus
30/12/2022
(336 woorde)

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag