Jongste aktiwiteit:

Tafereel

Het ek my net die prent verbeel:
Die gloeilamp wat die nag verdeel
– in skadu wat die haard* omring
en oor die stoep, ‘n geelligkring.

Wit mure en ‘n dak van sink
wat vaal’rig in die sterlig blink,
gordyne agter skemer ruite,
‘n sekelmaan aant wieg daarbuite.

Die wind wat deur die bome ruis
– sipresse – langs ‘n vyftigshuis*,
rook wat bo die skoorsteen talm,
‘n stem wat deur die stil weergalm.

Het my oë dit wel gewaar –
my sinne tóg die beeld ervaar:
Die gedaante wat deur newels breek,
die glimlag, wat haar oë weerspreek.

Haar hand nog rooi en ongewas,
die hef wat in haar palm pas –
toe sy om die hoek verskyn,
alvoor sy in die nag verdwyn.

*

Sou die wit huis – met sy stoeplig aan –
langs die verlate pad steeds staan?
Of … het ek my bloot die tafereel
oor daardie donkerland verbeel?

© Carma Shaw
16 Januarie 2017




Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat te sê het, en dat julle lekker saam sal lees :-)

2 Kommentare

Maak 'n opvolg-bydrae

Up
Top Ranked Users

[joinup_core_top_members columns=”1″ space=”no” max_members=”3″ behavior=”columns” columns_responsive=”predefined”]

Activity Feed