Die vrug van jou skoot
Mamma, toe ek klein was
was ek soos bloeisels vir jou oë
ragfyn sag en kneusbaar broos
in perskepienk en appelkoosblomwit
wat ontbloot aan naakte takke sit
swanger aan belofte
lentegeur en hoop.
*
Mamma, hier in Meimaand
hang my perskeboom se blare
so herfsdor aan hul takke.
My appelkoosboom het – na sewe jaar –
toe ook nie laas seisoen geblom.
Maar Mamma, jou bloeiselkind
het ság . . . tot rype vrug gekom
© C. Shaw
6 Mei 2016 from
Viooltjie
Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat te sê het, en dat julle lekker saam sal lees :-)
4 Kommentare
-
neels
Carma dit is asemrowend pragtig gestel
-
Koekekranka
O, dit gryp in die hart!!!!
-
Evelyn van der Merwe
Dis pragtig.
Maak 'n opvolg-bydrae
Jy moet aangemeld wees om 'n kommentaar te plaas.
Anze
Pragtig, baie dankie vir jou bydrae tot die Teenstellings projek