Ek kom haal jou in Augustus
Ek kom haal jou in Augustus
By Postberg, aan die Weskus
digby Langebaan –
dis waar madeliefies weer vanjaar
so geil oor vlak en rante staan.
En teen die duin’
– daar waar hul strandlangs hou –
blom vaalblaar salies roes en blou
langs die oranje, wit en geel geweef
waaroor meeue op die winde sweef.
Die blesbok en die eland wei
voor heuwels en ‘n krans verby.
Dis ‘n dikkop wat so eenbeen rus.
Die voetpad loop tot teen die kus.
En nou
– wyl Augustus na sy einde draal –
wens ek só
ek kan jou kom haal
wyl hierdie land van sand en klip
‘n bont sarong
oor lend’
en skouers glip –
hier by Postberg, aan die Weskus
digby Langebaan . . .
waar madeliefies wéér vanjaar
so wild en wyd oor velde staan.
© C. Shaw
1 September 2016
Viooltjie
Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat te sê het, en dat julle lekker saam sal lees :-)
7 Kommentare
-
neels
Carma hierdie een verdien n staande applous
-
Viooltjie
Baie dankie, Anze en Neels vir julle gereelde saamlees en kommentare. Dit word baie waardeer :-)
-
Kiekies
Ek het hierdie bont sarong vir 'n wyle om my eie heupe gedrapeer en dit was heeeerlik!!
-
Ronel Janse van Vuuren
Mooi gepen :-)
-
Cornien
Pragtig geskryf... dis voel mooi!
-
Viooltjie
Baie dankie, Cornien. ek waardeer die lees en kommentaar :-)
-
Maak 'n opvolg-bydrae
Jy moet aangemeld wees om 'n kommentaar te plaas.
Anze
Pragtig, baie dankie vir jou bydrae tot die Lente projek