ek sal jou onthou

vir ma 11/06/1945 – 23/5/2022

ek sal jou soek
in die volmaan se gloed
in die ysterklip
wanneer die geel gras
oor die veld wieg
in die hemelhoëhange
wanneer jou asem snak
in meiringspoort se gange

ek sal jou proe
in soetwyn en sushi
suiglekkers in ‘n blikkie
roomys en halva
en seafood pasta

ek sal jou ruik
in roosparfuum
lafentelolie en rooibostee
wanneer jy jouself
met liefde vir my aangee

ek sal jou sien
in elke irma stern
van gogh
en rosina wacthmeister
van 1980

ek sal jou hoor
in die liedjies van
demos roussous
nana mouskouri
en vicky leandros

ek sal jou voel
in jou hekellappies
en wanneer ‘n oumens
by my inhaak
gestut teen die swak

ek sal jou kry
in die kappertjies in my tuin
in ‘n beker kennakoffie
gemmertee
gewaagde kwashale
op ‘n doek
‘n mooi keramiekbak
en ‘n akademiese boek

vir jou sal ek onthou
en naby my hou.

27 Mei 2022
©️marikavanheerden

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag