
Heilige ibis*
Die son kom op net waar sy wil
en wys haar mooiste kleure
oor Blue Downs* en Driftsands* se duine.
Sy strooi haar gloed oor wilde tuine
wat weinig meer as sand en boegoe is.
Sy steek haar kop deur rook en mis
en vly haar skoonste lig oor roet en as –
dáár
waar net gister nog, die helse vure was.
En sonder oordeel skyn sy bloedig rooi
‘wyl sy die hemel van framboos
tot in die diepste diep oranje tooi.
Die son breek deur die donker wolk
en glim oor kuile en ‘n vlei
waarom die groenste riete groei.
Sy laat blink die laaste winter waters
wat nog in (amper droë) riviere vloei.
Sy gloei voor Helderberg se hang,
oor witgeverfde huise
waar die rykes woon.
Sy vlam oor fynbos en oor vlaktegras,
oor voetpad en teen heinings vas
waar agter plakkers
in plank- en sinkgehugte droom.
Die son skyn waar sy wil –
oor taxi’s en blink motors
en rus vir oomblikke verblindend, stil
bo ‘n brug wat oor die N2 baan.
En hóóg,
waar – in ambergoud – haar strale dans,
kruis ‘n ibis teen die hemeltrans.
En hy sprei sy vlerke vry en wyd . . .
in ‘n skadubeeld van heiligheid.
© C. Shaw
9 Januarie 2017
* heilige ibis – wit- en swartgekleurde ibisvoël
* Driftsands – ‘n reservaat ongeveer 20 km vanaf Kaapstad langs die R300 en die N2
* Blue Downs – ‘n informele woongebied aangrensend aan Driftsands
8 Kommentare
-
-
Amaspoke
Pragtig!! Uitstekende skrywe
-
neels
carma weereens op haar beste
-
Kiekies
Jislaaik, dis so....soo......Viooltjie-mooi!!! Wragtig pragtig!!
Maak 'n opvolg-bydrae
Jy moet aangemeld wees om 'n kommentaar te plaas.
HelenaMellet
Dis sooo mooi. Ek het lank in daardie area gebly. Verlang ek nou terug na 'n Helderberg sonsopkoms. Pragtig gepen, Viooltjie.