Hoeder van die uurglas

Hoeder van die uurglas

Jy was hoeder van die uurglas,
(met ons Thirty Seconds bordspel)
en, al was jy in die ander span,
die dobbelsteen het gunstig tussen ons geval.

Jy was hoeder van die uurglas
en met elke maal se leegloop
het jy triomfant’lik uitgeroep,
my haastige verduidelik verander in lag.

Jy was hoeder van mý uurglas,
‘n prisma vol belofte,
volmaak gegiet ons twee ineen;
voor jou kon ek my omkeer tot deursigtigwees.

Jy was hoeder van mý uurglas,
al die see se sand was ons s’n;
elke korrel het ek jou gegee,
my hele lot het ek vergeefs in jou gestort.

Want vir jou is die bordspel verby.
Jy het reeds my wêreld laat kantel.
En al dwing ek jou aframmelend oorredend tot begrip –

jý is hoeder van die uurglas.

©Marieta McGrath (brons)

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag