‘n Nuwe Plek om Boeke te Adverteer en te Vind

Wel, dis seker nie “nuut-nuut” nie, maar wanneer jy die wêreld van boekbemarking betree sien jy hierdie webtuiste met nuwe oë: Goodreads.

Ek het onlangs ernstig begin om my boeke – en boeke waarin my werk voorkom – te bemark op al wat ‘n sosialenetwerk is. Wat ek agtergekom het is dat meeste lesers hul nuwe gunstelinge op webwerwe soos Goodreads vind – ‘n plek waar hulle hul resensies (die goeie en die slegte) kan deel van wat hulle gelees het.

Daar is baie inligting, as jy op die regte plekke kyk op die webwerf, om jou “Author Page” te skep met al jou boeke. (Dis nou vir die skrywers/digters.)

En dis ‘n maklike plek om ander lesers te vind wat van dieselfde soort stories hou en hul resensies te lees – skep ‘n profiel, laai jou resensies en merk al die boeke wat jy nog graag wil lees. Dis soos ‘n kategolus van alles wat jy al gelees het en wat jy nog wil lees. Wen-wen vir leser en skrywer – as skrywer weet jy presies wat lesers dink en dis ‘n goeie manier vir lesers om vir skrywers te vertel wat hulle spesifiek van hul stories/gedigte hou.

Ek het Inkspraak op Goodreads gelaai: https://www.goodreads.com/book/show/37901478-inkspraak

Ongelukkig kon ek nie al die “vreemde” penname as skrywersname byvoeg nie, so party digters/skrywers is ongelukkig uitgelaat. Ek het my bes gedoen om almal se volle skrywersname te gebruik soos aangedui in die inhoudsopgawe. (Veranderinge kan gedoen word deur die regte besonderhede aan die “Librarians” te stuur sodat hulle dit kan byvoeg.)

So, die punt hiervan? Dis ‘n goeie plek om jou skryfwerk wêreldwyd te bemark. Jy kan “Goodreads Giveaways” gebruik om lesers in jou genre opgewonde te maak oor jou nuwe bundel/boek. Jy kan ook by verskeie groepe aansluit om oor boeke te praat. Ook, resensies maak dat nuwe lesers vertroue het in jou werk voordat hulle dit koop.

Die beste deel hiervan is dat dit maak dat jou naam (jou skrywersnaam) bekend word aan lesers. Onthou om altyd dieselfde skrywersnaam vir alles te gebruik – moenie op een plek Ronel van Vuuren wees, op ‘n ander Ronel J van Vuuren en dan weer op nog ‘n plek Ronel Janse van Vuuren nie. Wees konstant, dis die enigste manier om al jou skryfwerk op een slag voor te laat kom op “search results”.

So gaan vandag en sluit aan by Goodreads: al skep jy net jou bladsy, voeg al jou boeke by en gaan nooit weer terug vir enigiets anders nie, is dit goed vir jou Google “search engine rankings” wanneer iemand jou naam op die internet soek. (Volg die instruksies op die webblad om jou “Author Profile” te skep.)

Wanneer jy ‘n skrywer/digter in hierdie nuwe tegnologiese era is, moet jy leer om met die tegnologie maatjies te maak. Al is dit so wispelturig soos ‘n tiener…

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag