Op die asem van ‘n Pinksterwind
waar Pinksterwinde
in lank vergete doringskrif
vergifnisbriewe oor die aarde skryf
hier waar sonde so welig bloei
seerkry-wonde om genesing stoei
as daglig dan skaam
verby beloftewolke loer
om stuitig vir die son te koer
staar ons met splinteroë
deur gebroke rame
sien slegs ‘n spieëlbeeld
van eie ego (in lasuurblou)
vir dit – wat ons wil onthou
skeur natuur se klank-katedraal sag
val dit soos ‘n amber genade-verhaal
kom kruis die volle wete, diep geplant
daar is my toekoms reeds betaal
waar dit saam met herfsblaar
in ‘n drie-dag somtotaal
stil na benede draal
op die asem van
‘n Pinksterwind
© Anzé Bezuidenhout
Anze
Woorde is my asem en skryf my passie!!! Ek waardeer elke stukkie kritiek, verkieslik positief, maar kan die negatiewe ook hanteer. Dankie dat jy die tyd neem om na my werke te kyk en dit te beoordeel. Ek is n Boeremeisie in murg en been... mal oor die wye natuur van plaaslewe wat my omring Ek is getroud met die wonderlikste man (Willie). Ons is geseend met 3 pragtige dogters en 'n kleinseun en 3 kleindogters. My verhouding tot my Skepper loop baie diep en ek dank Hom elke dag vir al die voorregte en genade gawes wat ek so onverdiend ontvang... Loutering is deel van my lewe en ook daarvoor dank ek Hom daagliks want dit maak dat daar altyd groei in my lewe is...
8 Kommentare
-
Koekekranka
Beslis 'n gunsteling!!! Baie dankie hiervoor!
-
Anze
Baie dankie vir julle goue voetspore Evelyn en Koekekranka ek waardeer baie!
-
Arnold
"staar ons met splinteroë deur gebroke rame sien slegs ‘n spieëlbeeld van eie ego (in lasuurblou) vir dit – wat ons wil onthou" Hierdie staan vir my uit.
-
Anze
baie dankie Arno ek waardeer jou kommentaar sommer baie
-
neels
Sjoe Anze ek moet vir jou tien sterre gee hier
-
Viooltjie
Goeie werk hier gelewer Anze :-)
-
Anze
Baie dankie vir julle stilstaan Neels en Carma ek waardeer dit baie
Maak 'n opvolg-bydrae
Jy moet aangemeld wees om 'n kommentaar te plaas.
Evelyn van der Merwe
Sjoe, hier het jy vir goud gegaan. Uitstekend.