Bitterbos
Ek onthou ‘n tyd van volop weiding –
genoeg vir al jou skape
wat (in oorvloed) meerling lammers lam.
Ek onthou die byna purper wolke
en jou blydskap oor die waters
wat blinkblou stoot
verby die oorloop van jou dam.
Maar die velde lê nou immervaal.
Waar die vleie eens gevloei het
kraak die klei.
Jy slaan jou oë op na koper koppies –
(dáárvandaan sal die roes stof kom).
Die son verskroei, en die wolk bedrieg.
Die wind dra die leuen wat oor die reën bly lieg.
Bitterbos, honger en dors boer saam
met moedverloor . . . en hoopbeskaam.
© Carma Shaw
17 Januarie 2017
* Na aanleiding van die felle droogte in dele van die Noord-Kaap, Vrystaat en Sentraal Karoo. Teen einde Desember 2016, was sekere streke midde hul derde somerseisoen van uiters karige reën.
Viooltjie
Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat te sê het, en dat julle lekker saam sal lees :-)
4 Kommentare
-
-
Viooltjie
Baie dankie, Kiekies. Ek is bly dat jy saam gelees het :-)
-
-
Toom
Hier, ver, ver weg ly ek saam met julle. Maar ek moet my werklik inspan om droogte en warmte, dors, honger en moedverloor te ervaar. By ons is dit koud en bietjie depressief. Maar ek wéét hoe dit is -- het dit al beleef. Mag die droogte uitloop en die reent weer kom. Mag die lammers vris groen proe, mag julle bokspring op die dam se oewer. Besonders treffend beskryf, vind ek. GvT
-
Viooltjie
Baie dankie vir die heerlike saamgesels, Toom. Ons hoop ook vir genoeg reen op al die regte plekke. Ek waardeer die kommentaar sommer baie :-)
-
Maak 'n opvolg-bydrae
Jy moet aangemeld wees om 'n kommentaar te plaas.
Kiekies
Uit-flippieng-stekend!!!!