Die Kaapse Dokter

Die Kaapse Dokter

 

jy bestorm die Kaap gewetenloos en volstoom

met weervoospelling wat dae tevore oor jou waarsku

jy, die winterwind is koud, skraal en smoorkwaad

terwyl die beeldskone Kaapstad sonder teenstand

met afwagting op jou geweld en vernielsug wag

selfs met elke voorbereiding en rampbestuur

kon niemand oor jou spierkrag droom

 

netwerke waarsku, skuilings word voorberei

skole sluit en mense haas hul om voorraad te koop

krimp haweloses ineen en staal hul reeds teen jou

vir dae lank voorspel hul die geweld

daar word voorberei,

netwerke is gereed,

rampbestuur beplan,

skuilings voorberei,

skole is gesluit,

mense bly binnenshuis,

die dag en datum word bepaal want

die Kaap word dalk ‘n rampgebied

 

dan tref jy gevoelloos en dodelik land en see

bome buig, word wortel en tak uitgeskeur en val om

motors waai o

                      m

       mense huisloos

              sonder krag

dakke

a

f   geruk

s i n k p l a t e rondgeslinger

met hooggety en branders

slaan die branders 12 meter hoog

spoel dit oor restaurant se stoep

skuim jy saam by huise se deure en vensters in

terwyl jy tande wys en donderweer bliksemstrale slaan

moet liggame willoos sonder beskerming teen elemente stry

koud sny jy deur bibberlywe waar liggame

sonder klere onder ‘n hemel se plafon

papnat reën

 

… dan skielik … stilte

 

net so kom God se rukwinde in my lewe

dit ruk my heen en weer

snak ek na my asem as dit genadeloos om my swiep

voel ek klein en kragteloos

werp dit my stormsterk geestelik en emosioneel neer

 

as ek dan hulpeloos lê

hoor ek Sy sagte fluistering in Sy onsigbare briesie

tel Hy my sagkens op en gee my opnuut krag

en laat my neerlê in sy sagte liefdevolle hande

om my soos die Psalmdigter te lei na kalm water

waar daar geen storms, wind en gevaar my bedreig

en ek geestelik, emosioneel en liggaamlik kan rus

©Kopiereg Linda du Plessis 13/11/2024