SPOOKASEM (vir Natalia – lente 2016)
jy maak jou vas
jy bind jou los
ek wys vir jou
Karoo se bos,
die lang gras van die Vrystaat
en hoe Namakwaland kan blom
ek kweek in jou ‘n afdruk van die Kaap
*
in jou elke dag se wakker wees
– selfs ook in jou slaap –
lief ek elke krul en sliert se hang,
bly verwonderd oor hoe blosend daar
oor die sagtheid van jou wang
(soms nog)
‘n gloed van onskuld en skugterheid ontvlam
hoe mooi is jy in jou jonkheid, kind
jou hare los, of opgebind
so effens wild,
soos asem – vry
*
en iewers binne my
knoop ek jou vas
bind ek jou los
aan Vrystaat gras
en suikerbos,
aan Namakwaland se lenteblom
. . . en aan ‘n afdruk van die Kaap
© Carma Shaw
25 Oktober 2016
Viooltjie
Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat te sê het, en dat julle lekker saam sal lees :-)
5 Kommentare
-
-
Viooltjie
Baie dankie, Estelle Piek. Ek waardeer die gawe woorde :-)
-
-
Anze
Pragtig, baie dankie vir jou bydrae tot die Oktober projek
-
Kiekies
Uit-bloemieng-stekend gedoen!! Dit raak sowaar aan my hart, ja.
-
Viooltjie
Baie, baie dankie, Kiekies :-)
-
Maak 'n opvolg-bydrae
Jy moet aangemeld wees om 'n kommentaar te plaas.
Estelle Piek
Carma-jy soon verouderde wyn- hierdie plasing beter as meeste sg. erkende digters.