Uit die kombuis (Goud)

Soos doekpoeding,
gestoom in Keulse linnedoek
met pypkaneel en neutmuskaat uit ver Malei gespesery,
sultanas en korente
uit die stormkaapvallei,
vir skóp ‘n leksel brandewyn
uit Cognac se kontrei,

deur tien dekades saamgedra
met hier en daar iets aangepas,
glanskersies vir ‘n bietjie kleur
nog gemmer vir die ékstra geur
en net vir pret sommer verfraai
met tiekies uit ‘n bêrelaai …

sy’s nxa!
sy’s flaai!
sy’s eiegoed!
sy’s preuts en kwaai,
erg ondeund tóg suikersoet,
ons moedertaal uit Tafelbaai!

©️Elize Kruger
11 Desember 2024

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag