Afrodisiakum

sommer so sonder rede
sommer tussen gister se storms
en vandag se nimmereindigende vrede
met ‘n koddige systap en trippel
‘n skalkse glimlag sonder rede

verskuil in ‘n ondeunde koekeloer
gehekel met aweregse stekies teen reguit lyne
weggesteek in onontdekte plekke
agter raserige skarniere van verweerde hekke

rug aan rug teen afgewitte mure
iewers tussen skemer en dag se uitgerekte ure
begrawe in klam boombegroeide woude
van hierdie digter se skaduryke mond –

daar proe ek jou afrodisiakum, my lief.

© Almarie truter