‘n helderpienk gedig
daardie dag waarop jy dood is
was Matsikamma aan die blom
oor die rantjies en die rûens
tot onder in die laagtes
waar kuile in valleie kom
die pienkste kandelare
het gebloei deur sand en klip
en dat iets so mooi verby moes gaan
was veels te hoog vir my begrip
maar daardie herfsdag – toe jy dood is –
was ek stom, was ek verslae
dat die hange van die Gifberg
nog steeds sy skoonste jas sou dra
*
jou pen het op my hart graveer
in ink en kleur wat nooit sal wis
en op daardie dag (van skamel hoop)
het ek eens verstaan
dat dit so is
ek wou jou groet in nag se ure
in skadukamers sonder lig
maar tóé
word elke woord van jou aan my
niks minder
. . . as ‘n helderpienk gedig
© C. Shaw
18 April 2026
6 Kommentare
-
Evelyn van der Merwe
Pragtige opbou na 'n uitmuntende slot. Hou hiervan.
-
Anze
Maggies maar dis goed!! Jy MAG maar dig... hierdie is briljant vasgepen van begin tot end!
-
Arnold
Ek sal graag die foto wil sien, goed neergepen.
-
Amaspoke
Uitstekende werk
-
Kiekies
Wow WOW WOWWWWW! Ek hetti woorde nie!
Maak 'n opvolg-bydrae
Jy moet aangemeld wees om 'n kommentaar te plaas.
neels
Carna dit is n hart roerende werk