Eens was alles lig en vry
Ek loop kaalvoet –
verby koraalboom en granatebos.
Die wit roos skud haar blare los
oor die warm teer.
(Skerp klippies maak my voete seer)
Tot by
koue water, sagte sand,
meeue oor ‘n weskusstrand,
die hete son.
*
En nes skulpgruis wat aan enkels klou
en merkies maak,
só voel ek jou nog aan my lyf –
hiér
waar seeskuim op vlak branders dryf
en patroontjies oor die aarde skryf.
*
Ek loop kaalvoet langs die duine
en by blink rotse verby verby verby
(Eens was alles lig –
eens was als so vry).
© Carma Shaw
22 November 2017
Viooltjie
Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat te sê het, en dat julle lekker saam sal lees :-)
Maak 'n opvolg-bydrae
Jy moet aangemeld wees om 'n kommentaar te plaas.