Daar waar vrede lê

my hart verlang
na die sonbesie-hitte
wat lui luimer
oor karoobos en klippe

na die ding-dong
van ‘n voorloopskaap
wat smag na weiding
net die beste wil opraap

my hart verlang
na wye, oop vlaktes
waar stilte en vrede
salfsmeer aan nerfskuur-gedagtes

waar gesigseinder
ver oor rante strek
my hart se teer verlange
na sielsvrede kan rek
©Driekie Grobler