Oggendvers

Voor die dagbreekhaan kraai
wil ek iets vir jou skryf
want ek moet ‘n vers vir jou los
by die suiderkruis se laagste punt
net ‘n paar woorde
terwyl die maan
nog in jou arms slaap
voor die klam oggend
jou wakker maak
met haar deurskyndende asem
en die vrese van gister
jou naam afstof

wil ek hê jy moet altyd onthou
dat skrywers nooit doof raak nie
en dat elke bang klank
se ellips jou altyd sal oopvou
naby sterre met helder lig.

© 9/2022 Caren Kearley
FB: Nimfoleptiese Woorde